Mov fuelhkie 2

Mov fuelhkie

Åvla

Mov nomme Åvla. Manne leam njieljieluhkien jaepien båeries. Manne jïh mov fuelhkie  aktene gåetesne Deavageajnosne 16 årroeminie. Mov leah göökte maanah, akte nïejte gïen nomme Sajle jïh akte baernie gïen nomme Aanta. Mov gåmman nomme Sööfe.  Mijjen aaj bïenje, Tjeehpe, jïh gaahtoe, Veelke. Manne doekijinie barkeminie. Daelie manne mobiltelefovnh doekeminie. Mov gåmma lea lohkehtæjja. Sajle noereskuvlesne vaedtsieminie, åktseden klaassesne. Aanta jis, jåarhkeskuvlesne vaedtsieminie. Dïhte sæjhta elektrihkerinie sjïdtedh. Sajle ij annje daejrieh maam sïjhth darjodh.Gosse im barkh dellie tuhtjem luste gærjam lohkedh. Joekoen luste histovrijegærjah lohkedh. Manne aaj lyjhkem vaeresne mïnnedh. Mijjen lea onne hæhtjoe mearoen lïhke. Dahkoe mïnnebe gosse eejehtalledh. 

 

 

 Sööfe

Mov nomme Sööfe. Reakasovvim jaepien 1967. Mov leah göökte maanah jïh geelle. Im leah manne daesnie byjjenamme. Stjørdaeleste båatam.  Manne leam raeriestæjja, men daelie manne lohkehtæjjine barkeminie. Manne lyjhkem tjoejkedh jïh ålkone årrodh. Hijven aaj hæhtjosne årrodh, men nåake gosse iktegisth dan vaenie lopme desnie. Gosse gåetesne, dellie im hïnnh dan jïjnjem darjodh. Vaarjoeh bïssedh, gåetiem sjeakodh, beapmoeh jurjiehtidh, maanide dohkh diekie skovhtestidh   jïh naemhtie vijriebasse. Hijven mov lea dan væjkele geelle gie aaj viehkehte. Jïh daelie mov maanah dan stoerre sjïdteme, dah guaktah aaj gåetiebarkojne viehkiehtægan.

 

 Sajle

Mov nomme Sajle. Luhkienjieljien jaepien båeries. Daate lea mov minngemes jaepie noereskuvlesne. Hijven domtoe! Mubpien jaepien jåarhkeskuvlesne aalkam. Manne leam healsoefaagem syökeme. Im rikti daejrieh mejtie dïhte munnjien sjeahta. Im manne daejrieh maam edtjem sjïdtedh. Im gan daejrieh maam lyjhkh darjodh. Daajram hov gellie aath mejtie im lyjhkh. Im lyjhkh lohkedh jïh im lyjhkh saavredh. Im lyjhkh ålkone årrodh jïh im lyjhkh maanah. Im lyjhkh beapmoeh jurjiehtidh jïh im lyjhkh bååhkesjidh. Tjidtjie jeahta manne byörem lohkehtæjjine sjïdtedh. Ij gåessie gænnah!

 

 Aanta

Mov nomme Aanta. Aadtjegh luhkie gaektsie jaepieh illeme. Daate mov mubpie jaepie jåarhkeskuvlesne. Elektrihkerfaagem lohkeminie. Iktesth daajreme manne sïjhtem elektrihkerinie sjïdtedh, vïenhtem dïhte lustes barkoe. Gosse im skuvlesne dellie manne datamaskijnen uvte tjahkesjem. Luste hov spïeledh! Manne aaj lyjhkem tjengkerem tjïektjedh jïh mov nïejtine ektine årrodh. Åvtesne lyjhkim tjoejkedh, manne aaj gaahtjim. Dejnie manne orrijamme. Idtjim vielie asth. Aehtjie åtna dïhte nåake. Manne aaj lyjhkem musihkem goltelidh. Muvhten aejkien aaj gitaarem spïelem.

 

 

 

 Vaestedh gyhtjelasside:

  1. Man gellie maanah Åvlan?
  2. Mejnie Åvla barkeminie?
  3. Maam Åvla lyjhkoe lohkedh?
  4. Mejnie Sööfe barkeminie?
  5. Guktie Sööfen geellen nomme?
  6. Man båeries Sööfe?
  7. Gubpede Sööfe?
  8. Maam Sajle sæjhta sjïdtedh gosse
    båarasåbpoe?
  9. Man gellie jaepieh Aanta jåarhkeskuvlesne vaadtseme?
  10. Åvlan lea nïejte?
  11. Man åvteste Aanta orrijamme tjoejkedh?

 

   Tjaelieh åenehks teekstem dov jïh dov fuelhkien bïjre.

 

This entry was posted in Aalkoe (under arbeid). Bookmark the permalink.

Comments are closed.