Daelie edtjem mov staaren bïjre soptsestidh. Manne Tråantesne årroeminie, Nöörjen njealjede stööremes staare. Medtie 180 000 almetjh daesnie årroeminie. Jaepien 997 dïhte Nöörjen gånka, Olav Tryggvason, staarem tseegki.

Dïhte voestes saemien laantentjåanghkoe lij Tråantesne goeven 6. biejjien jaepien 1917. Dïhte åehpies saemien nyjsenæjja, Elsa Laula Renberg, lij akte dejstie åejviealmetjistie mij tjåanghkoem öörni.

Tråantesne joekoen stoerre jïh tjaebpies gærhkoe mij gohtjesåvva Nidarosdommen. Bigkesovvi bijjelen tovsene jaepiej åvtelen.

Ij leah barre akte museeume Tråantesne, men gellie! Gååvnesieh aaj saemien vuesiehtimmieh. Tjidtjie jeahta mov maadteraahkan boengeskuvmie lea aktene museeumisnie Tråantesne.

Munkholmen lea akte onne sååle Tråantefjovlesne, göökte kilomeeterh Tråanteste. Dejbeeli lij klååstere dunnie såålesne. Mænngan almetjh vaarjelimmiegåetiem bigkin, jïh dohte vaarjelimmiegåetie aaj geeremegåetine nuhtjesovveme. Daan biejjien sååle lea turistattraksjovne. Dahkoe jïjnjh turisth pruvhkieh mïnnedh.

Tråantesne aaj universiteete jïh jïlleskuvlh. Gosse manne jåarhkeskuvlem illem edtjem aelkedh universiteetesne lohkedh.

Tråantesne aaj gellie ovmessie bovrh. Daesnie maahta gaajhkem maam daarpesje åestedh, jïh ånnetji vielie. Staaresne aaj jïjnjh beapmoesijjieh. Akte dejstie gååvnese aktene jïlle tåårnesne, mij gohtjesåvva Tyholttårnet. Daate tåårne jårreminie, jïh debpede maahta abpe staarem vuejnedh.

Manne mov staarem lyjhkem. Sïjhth datne Tråantesne mïnnedh? Buerie båeteme!

 (trykk her for å lytte)                                                                                            (trykk her for ordliste)

Laavenjassh:

1.Vaestedh gyhtjelasside:

1. Man gellie almetjh Tråantesne årroeminie?
2. Gie Tråantem tseegki? Jïh gåessie?
3. Gåessie Nidarosdommen bigkesovvi?
4. Gusnie dïhte sååle Munkholmen?
5. Man åvteste Tyholttårnet åehpies?

 2. Tjaelieh akten jeatjah staaren bïjre. Ohtsedh bïevnesh gaskeviermesne.